«Real» va «MYu» boshchiligidagi Superliga tarafdorlari tez orada yangi turnir yaratilishi haqida e’lon qilishadi
19.04.2021, 06:09
Bir qator klublar tez orada Yevropa Superligasi yaratilishi haqida e’lon qilishadi, deya xabar bermoqda Marca.
Manbaning yozishicha, bu UEFAning 19 aprel kuni Chempionlar Ligasi yangi formatini tasdiqlashi mumkinligi bilan bog‘liq. UEFAning yangi formatiga javoban «Real» va «Manchester Yunayted» boshchiligidagi Yevropa Superligasi tarafdorlari bo‘lgan klublar yangi turnirning yaratilishi haqida e’lon qilmoqchi.
Qayd etilishicha, Madrid klubi rahbariyati Key Capital moliyaviy firmasi bilan birgalikda Superliganing yangi loyihasi bo‘yicha ishlagan. Barcha superklublar ushbu loyihadan xabardor qilingan. Unga ko‘ra, top-klublar ushbu turnir orqali bir yilda 350 million yevrogacha daromad olishlari mumkin.
Avvalroq, «Liverpul», «Arsenal», «Chelsi» va «Tottenhem» ham moliyaviy katta daromad keltiradigan turnirda ishtirok etish masalasida o‘z roziligini bildirgani, PSJ, «Bavariya» va «Yuventus» esa hozircha bu masalada aniq javob bermagani aytilgandi.
Eslatib o‘tamiz, FIFA va UEFA fevral oyida Superliga yaratilishiga qarshi ekani haqida bayonot berib, bu turnirda ishtirok etgan klub futbolchilari milliy jamoalar safida jahon chempionati va qit’a chempionati o‘yinlariga qo‘yilmasligi haqida ogohlantirgandi.
Manba: www.tribuna.uz
