Klopp Sulsherni qo‘llab-quvvatladi
13.05.2021, 12:03
APL 36-turi doirasida «Manchester Yunayted» o‘z maydonida «Lester»ga qarshi deyarli zaxira tarkibi bilan maydonga tushib, mag‘lubiyatga (1:2) uchragach, bir qator mutaxassislar mankunianlar bosh murabbiyi Ole-Gunnar Sulsherni tanqid qila boshlagandi. «Liverpul» ustozi Yurgen Klopp esa norvegiyalik hamkasbini qo‘llab-quvvatladi.
«Bizga qarshi o‘yin oldidan Sulsher «Lester» bilan bahsda tarkibni o‘zgartirishini kutgandim. O‘zaro o‘yinimiz qoldirilishiga va «MYu»ning taqvimi yakshanba-seshanba-payshanba ko‘rinishiga kelishiga sabab bo‘lgan Manchesterdagi namoyishlar bu – jinoyat.
Ularning taqvimi dahshatli – 5 kunda 3 ta o‘yinni bir xil tarkibda o‘tkazib bo‘lmaydi. «Lester» bilan o‘yinda tushirilgan zaxira tarkibi bu Sulsher yoki futbolchilarning aybi emas. Bunday vaziyatda men ham shunday qilgan bo‘lardim», – deydi Klopp.
Avvalroq, Angliya milliy jamoasi sobiq futbolchisi Trevor Sinkleyr «Lester»ga qarshi uchrashuvga zaxira tarkibini tushirgan va mag‘lubiyat sababli APLdagi YeChL yo‘llanmasi uchun kurashga ta’sir qilgan «MYu»dan 6 ochko olib tashlash zarurligini ta’kidlagandi.
Ma’lumot uchun, «MYu» – «Liverpul» o‘yini 2 maydan 13 mayga ko‘chirilgani sababli Manchester klubi 5 kun ichida 3 ta o‘yinda maydonga tushishiga to‘g‘ri kelmoqda.
Shu bois Sulsher 9 may kuni «Aston Villa» (3:1) bilan o‘yinda maydonga tushgan futbolchilarni 11 may kuni «Lester»ga (1:2) qarshi asosiy tarkibda maydonga tushirmay, «Liverpul» bilan o‘yinga (13 may) olib qo‘ydi.
Manba: www.tribuna.uz
[Изображение удалено]