Aleksis Sanches «Manchester Yunayted» xohishini bajarmadi
17.08.2019, 06:47
«Manchester Yunayted» klubi rahbariyati «Roma» bilan hujumchi Aleksis Sanchesning ijarasi haqida kelishib olgan edi.
Bitim shartlariga ko‘ra, agar Sanches «Roma»ga o‘tsa, «qizil iblislar» uning yillik maoshi yarmini (9,5 million yevro) to‘lashga tayyor edi.
Biroq chililik to‘purar bu taklifni qabul qilmadi, deb yozadi jurnalist Tankredi Palmeri o‘z «Tvitter»ida.
Sanches «Manchester Yunayted»ga 2018 yil boshida «Arsenal»dan o‘tgan. Uning mankunianliklar bilan tuzgan shartnomasi 2022 yil 30 iyunga qadar mo‘ljallangan. 30 yoshli hujumchi faoliyati davomida «Barselona», «Udineze», «River Pleyt», «Kolo-Kolo», «Kobreloa» jamoalarida ham to‘p tepgan.
Sanches o‘tgan mavsumda «Manchester Yunayted» tarkibida barcha turnirlar doirasida 27 ta o‘yinda maydonga tushib, 2 ta gol urgan va 4 ta golga hammualliflik qilgan.
Manba: www.tribuna.uz