Maguayr internetdagi haqoratlardan shikoyat qildi
20.08.2019, 22:24
«Manchester Yunayted» himoyachisi Garri Maguayr APL 2-turidan o‘rin olgan «Vulverxempton»ga (1:1) qarshi o‘yinda penaltini aniq amalga oshirolmagan jamoadoshi Pol Pogbani haqorat qilgan ijtimoiy tarmoqlar foydalanuvchilarini tanqid qildi.
«Bu juda jirkanch. Bunga qarshi nimadir qilish kerak. Ijtimoiy tarmoqlardagi har bir foydalanuvchining shaxsi pasport yoki haydovchilik guvohnomasi bilan tasdiqlanishi shart. Haqorat qilish maqsadida ochilgan akkauntlarni to‘xtatish kerak», – deb yozdi Maguayr «Twitter» sahifasida.
Qayd qilish joizki, «Manchester Yunayted» matbuot xizmati ham Pol Pogbani haqorat qilgan fanatlarni qoralagan edi.
Manba: www.tribuna.uz