Ronaldu France Football bosh muharririni yolg‘onchilikda aybladi
30.11.2021, 09:36
«Manchester Yunayted» hujumchisi Krishtianu Ronaldu «Oltin to‘p» sovrini muassisi France Football gazetasi bosh muharriri Paskal Ferreni yolg‘onchilikda aybladi. Jurnalist oldinroq Ronalduning futboldagi asosiy maqsadi Messidan ko‘proq «Oltin to‘p» olish ekani, bu haqda unga futbolchining o‘zi aytganini iddao qilgandi.
«Paskal Ferrening aytishicha, mening futboldagi maqsadim Lionel Messidan ko‘proq «Oltin to‘p» olish ekan. U yolg‘on gapirgan. Shu tariqa o‘zi va gazetasini mashhur qilish haqida o‘ylagan. Shunday qimmatli sovrinni topshiradigan inson France Football va «Oltin to‘p»ning qadrini tushiradigan bunday yolg‘on ishlatishi to‘g‘ri emas. U bugun marosimga bormasligim sababini karantin bilan bog‘lab yana aldadi.
Sportda mahorati evaziga g‘alaba qozonadiganlarni doim tabriklab kelganman, chunki hech qachon kimgadir qarshi bo‘lmadim. Futboldagi asosiy maqsadim klubim va milliy jamoam uchun sovrinlar yutish, professional futbolchi bo‘lishni maqsad qilganlarga o‘rnak bo‘lish va futbol tarixiga o‘z nomimni oltin harflar bilan yozib qoldirishdir.
So‘zim oxirida aytmoqchimanki, hozir butun xayolim «MYu»ning keyingi o‘yiniga qaratilshan. Qolgani qiziq emas», – deb yozgan Ronaldu Instagram’dagi sahifasida.
Faoliyati davomida 5 marta «Oltin to‘p» bilan taqdirlangan Krishtianu Ronaldu bu sovrinni oxirgi marta 2017 yil qo‘lga kiritgan edi.
Manba: www.tribuna.uz
[Изображение удалено]
