Ronalduning «MYu»ni tark etish istagi Ten Hagga aloqador emas
03.07.2022, 14:03
«Manchester Yunayted» futbolchisi Krishtianu Ronalduning jamoani tark etish istagi haqidagi xabarlar ko‘payib bormoqda.
Jurnalist-insayder Fabritsio Romanoning yozishicha, portugaliyalik futbolchi rostdan ham «MYu»ni tark etmoqchi. Uning Mendeshga yaqin manbalardan olgan xabarlariga ko‘ra, agent manchesterliklarga mijozi klubni tark etishni istayotganini ma’lum qilgan.
Lekin bu Ronaldu «MYu»ni ushbu yozda tark etishi aniq degani emas. Ammo 37 yoshli futbolchi «qizil iblislar» uning transferi borasida taklif kelib tushsa, ko‘rib chiqishini xohlamoqda.
Ronaldu klubdagi vaziyatdan va transfer siyosatidan norozi. Iyul oyi boshlangan bo‘lsa ham, haligacha mankunianlar birorta yangi futbolchi bilan shartnoma imzolamadi. Aksincha, jamoani bir qator futbolchilar tark etdi.
Ma’lum bo‘lishicha, futbolchining Erik ten Hag bilan hech qanday muammosi yo‘q. Uni klubning ambitsiyalari xavotirga solmoqda.
Eslatib o‘tamiz, Ronalduning «Manchester Yunayted» bilan shartnomasi 2023 yilga qadar mo‘ljallangan.
Manba: www.tribuna.uz
[Изображение удалено]